Torang-torang dangka, di na laos bincar do pe sidumadang ari panaili ni langit manyondangi portibi, sian abincaran lopus tu alusutan, tingon purba sahat tu pastima, sian anggoni tu manyabia, bo pe ngon dangsina tu utara, sang ape tingon irisana tu nariti (nidok do on desa na walu) nangkan on sude do sumirlak-sirlak muda dung marnyanga-nyanga sinondangna. Um soto lopus do pe kotu subuh. Tingon bagas na sada tu bagas na sada tarbege ma maturapak mambukai tingkap asa lobu ni manuk. Songon i buse sora ni na mangkuhur matuurkur dohur-dohur, boti sora ni losung dotung-dotung anso ulang muap losung bulung gadung i. Muda di bagas na martarup seng abegean do sora ni alintaktak matutaktak marantak-antak.

                Niligi tu ruar ombun manyorop, ngalina manyogi songon na muldus doma rasona buhl-buhul i, mambaen nalosok mur ma malosok, markujajing do ia gulung manyuhung mangulaki manarik ulos. Anggo di na ringgas ba madung muli do ia manjala tingon Batang Gadis an. On ma na nidok santampul dua lancim, santaba dua marobo, arana sibuk le mun maias baluang pe marisi garing, siating sanga na lonjing pe tola. Manombo cencen, siroken, lelan sanga baung pe inda mangua tuk ma i lompaon, so adong dongan mangan.

                Si Cenek (Jabindoran), dongan nagkan tajamitaon on madung lolot do tarsunggul modom, dung sidung nangkin sumbayang, madung tarlayansa do piso takiknia aduana, arana nangkan mangguris torus mandaek do ia sadari on. Nai Tambat, dongan sabagasnia

Dompak markacak manyonduki indahan taro manggaor-gaor gule, gule tunas ni kohol na tingon Simandolam mambaur asang muring marpangaronca ulu ni barbarian. Uapna morlum-orlum tingon tataring i. Manetek ijur ni si Cenek tu bagasan, girdoan ia giot marsilamoton.

                “Inda pe laa masak iang ni si Tambat?” ning ia marsapa.

                “Sootik nai angkang, urang lampot do pe ulala asang muring na on”

                “ Ulang dabo jabat torangan ari iba so manangkok, na dao do pe boto ho dalanan!”

                “ Amang, git tetek lala au !” ning si Tambat tulambung ni amangnia.

                “Bo le baya, keta ni patibu !” ning amang nia, taro manompi sinuan tunas nia i mopop-opop tu kulak an.

                Dung lalu tu kulak paridian , na padonok-donok rongkon partuaekan i, apenganan madung juguk do di bangku-bangku papan panopian i topi dalan laos mijur tu jamban i donganna sangoncap, si Tautan.

                “ Bo, na i son do amu lae, inda manangkok kamu langa sadarion?” ning si Cenek, mandokon si Tautan.

                “Manangkok do ba, anakta tuaek i si bo!” ningna mangalus.

                “ Au pe, on ma bo! Adope ke ma ni tu si!” ning ia mandokon pinompar nia i sareto mambuka saraor ni danak i, bia mantong urang lobi opat taon do pe umurna, bali so bali do on dohot anak ni si Tautan na dompak tuaek di jamban i.              

                Rap juguk ma alai na dua taro mangidup taro mangecek mangkatai .

                “Piga ari do takik muyu sapoken on lae?” ning si Cenek mamuloisa.

                “Inda na piga ari jabat ipar, te pabagaskon moranta i i Manambin ari akat i, mangarti ma amu inda na targarar utang niba di si.

                “Bo, sundatna ma ba i, te mora na so gakgakon, utang samatua. Pamasak gule tinggaung do amu songon i .”

                “Olo ipar, te ba na dao do ulala pangalapanna i lambung ni Tor Mandagangan!”

                “Tar songon dia do rupana parbulung ni tinggaung on lae?”

                “Au pe da songon dia ma ningku, inda adong ning roangku dita on, nabahat luok ma na ubolus uloloi um di Manambin an ma ia uboto na dong na songon i.”

                Lalat alai na dua mangkatai taro painte-inte pomparanna na tuaek i.

                “Pasigop bo!” ning si Cenek.

                “Olo ayah!” mangalus anakna ngon jamban i.

                Ngada sadia lolot nida si Cenek jumbol ma danak ngon jamban i, bulus apuan ma ia mijur git mamasu te ni danak i, anggo ganjingna ilalasa ia ngada tardokon, tai biama pompar. Bulus itiop ia tangan ni danak i salao ipadonok ia tu pancur ni kulak i, iuras ia urut ni danak i dohot tangan siambirang nia. Kentong taru na so sajo danak on, inda mangkuling, inda manggulit, ranan manyikur songon na mabiar.

                “Aso do sipso sajo ho?” marsapa ia heran ilala ia, somalna na bahat do kecek ni anak nia i. Bauna ilala ia te ni danak i tukma.

                “Aha de i ayah!” ning si Tambat todingkon  jamban nangkinondi.

                Tarsonggot tarkorjung si Cenek tarkalimanman tarkalimunmun. Aha do rupana ngana anak nia nangkin na nibasu nia i.

                “Sobar kamu ipar, ngada tarkaua be i, angke ngada alak na dao i na nibasu muyu i, amang na poso muyu do i.” ning si Tautan ngon kinjang taro mantata matukakkak matukikkik maniopi siubeon nia.

                Adopentong, jama tot jama ulu do ma da, iaua ia do pe i, pompar ni si Tautan do rupani.

                “Oton ayah, mauliate mada ipar di denggan ni roa muyu i di amang na poso muyu on!” ning si Tautan muse do pe mangolas-olasi ia laos muli taro mekel-ekel.

                “Olo, pajolo mamu!” ning ia mandemes pangalusna milasan odokan ia di ngali ni ari i, bo dua noli mamasu te ia antong manyongot on.

Tombang Bustak, 2005

Jasinaloan

Anggo sapetona da bo le,  ngada na parsomak da bo on angkanta Jamanggete on. Sian sandigan i, nang rap binoto do baso na lomok do on sisolkotta on, lambok lumate-late, songon parbuluing ni si lumambe bulung, gonan unduk pado gakgak, na toruk pangaroa, na malo mangoncot roa, lamam parkata-ata, injang so adong gotapon, pondok so adong uduton. Na so unjungada do ibana marteas marjampolak markarahar di ata na so dokonon, ata na so majop na so mauli madenggan di si panangi ni dongan si pambege. Songkoni di parkata-ata, songon i muse ma di tata ni boina ja na dohot ise pe ibana pasuo, leng na sumonang ma roa ni dongan mida ia na denggan pangaroa i.

Muse sibat ni parlopontong angkon na malo do mambuat roa ni dongan, jana sobar paiut-iut parkobaran ni angka dongan na marragam-ragam i, bo pe manombo dodas do na mapancing do iba patangi-tangisa. Manombo pupu do ipabaen-baen ia songon na marsitundu, so marmulakan alak na ilopo i, arana madung tonga borngin ari, leng na so muda-muda, leng na so marnasude do pe parkobaran ni alai (sumurung lobi di malom Jumahat), bo asik alai mangkobari iba le marnono mata, ningna do manombo ro di pangaroai nia. Arana jabat do di ginjang ni na pukul sapulu, na bahatan tulisonkonon do ma i tu buku utang, tarantonting muse non tambu aek, angke nguasan antong na marburas i, boti ma mangalitu inumon i. Tai na mur mur mararat do pe obaran ni alai tu laut si kutoro, obaran na so marjae na so marjulu na so unjung sibul ata, matobang ata songon di pantar paradaton.

Anggo niparorai ia manombo, git iantak ia do na marlopo i, kentong muda niantak na marlopo on, nangkan tading i buku do ma utang ni dongan na dung marjimpalut i kinan, marlampak ni ampolu, opat ma buku godang na dung abis panulisan ni utang ni angka dongan na marlopo dot ia. anggo na manungguisa do na payah do i so marbayar. Ra do naron burangkit ia mandumpuri” Um sa i tangna taru na itungguimu ma dongan, parahna ilala ho um sa i !”  i ape naron ngada be marnaro tu lopo i be, muda pasuo pe sanga keres di dalan na teus sajo do ma oroman nia. Anggo utang i lek so margarar. Tuntun sala ningna di pangaroai nia. Suang ma songon na mangang pining si sungkot kola pinangan mate ina so pinangan mate ama, songon ngotngot di bagasan ipon, tungkol dibagasan ngadol,tean-tean ma askasan ate-ate nia muda taringot tu si.

Sakali sanoli di malom salasa, anggo ajat nia, sondia ma sugari anso do ma tumibu doma martutup jambur nia i. Arana na lojaan ilala ia narian, manganjaki eme na dung sidung nidege boti iangin dongan sabagas nia i saba julu. Muli do nian sude tu bagas, tai rukek doma ilalasa pamatang i ibaensa.

Tai le,    Iaua ma ningku tinoto

             Marsiranggutan maroban roto

             Iaua ma he binoto

             Muda dongan na so mamboto

Lopeh sumbayang magorip i bagas, itindo ia tu lopo madung satonga gok alak na minum di si. Um diida dongan sabagas  nia i ia jumbol di pintu i. Marlidung ma inang ni danak nia i:

“ Angkang ma jolo i son, so upapodom jolo si Dalian.” Ningna marlidung. Amman dongan ma mangakali anak boru on, inda tar juantong mandokon ulang, inda tama boti tupa muda marsialusan iba di jolo ni dongan. Oni’ntong inda tarkonga ilala ia na lojaan induk ni api nia i, angke ia pe nida ia do sanga songondia markacungcengna anak boru i sadari on. Ia na mardege, ia muse na mambuat sagean tu bunbun i. Untung ma telehe anggo silamoton na dung nipasingkop ni inang si Dalian di andostorang i. Indahan na dua kadah ingkayuna gule apesong marpangaronca aso-aso. Taringot di painum kopina ngada se na tarpasingkop ia be, um na pangan- panganon na i jambur i doma itungkussa, ja na kue bika bop e kue talam dohot kue mangkuk na itompangkon ni alak di jambur i. Sibaen i tubu ma di rohana, diar mada ipajolosa na margulung-gulung i.

“ Tingon dia de he amu nangkin, uida amu potang-potang i rap dohot anakta, si Sori, ibondar tongaan.” Marlidung Jagulombang adop Kari Muda.

“Ooo, na tingon saba julu do ami!” ningna mangalusi.

“ Madung sidung do, muli tu bagas ementa i kan?”

“ Olo, ami na mangarsik do dabo ami nangkini. Muda dung songon on dabu sidung manyabi dodas do ami arsik arur i, sanga aek na longko-longko di toru sitapangi i!” ning ia muse.

“ Kelehe, margulaen de he i?”

“Allah, burincak do ba, ikan timah, aporas, sulum. Sasanoli nian adong do i lonjing ja na incur, anggo bakok dohot itok na sundatma bahat i si. Tai anggo gumudang sotik aek ni bondar arur i, ra do manombo dapot anak ni akan mas sanga pe non siroken na mayop tingon tobat ni dongan di julu.” Ning Kari Muda.

“ Au dongan, anggo martaringot di gulaen do ning kamu, inda na gabusku on, dompak mangaranto au narobi di luok ni Ranto Parapat, unjung do kehe ami mangkail di rodang na bolak i, ompanna sada touk ma binaen, pamoranna bulu sorik, pala manyotop ma ulala, usintakkon sagogongku inda mangkat, mordok jabat bulu sorik na sabotohon i. Dung ami duai mangarekreksa bo matipuk pamoran i, apenganan ningkamu sadanak godang ni aruting i” ning Japanden.

“ Ah, na peto de he dongan carito muyu i kahanggi? Au boto na joman ma ubege uristak sayuran arambir di portibi, na so unjung do pe uida aruting na sadanak ning kamu, tai anggo sabitis ampot do pe.” Marlidung Jagulombang.

“ Aso’ntong nga pursaya amu, ke iboto amu do au parsulambo. Unjung do boto din a saborngin, dompak manaon sulambo di parsulamboanku na di julu ni9 musojit  i,ak dongan, na jebu ma da. Mardorus-dorus do ma garing i laos pahae, golap jabat bayangan i, ee.. ke saadangan saulak sintak. Di na pangabisan dotes do pe mera na godang, anggo na so sala mata au, ra do gakku tolu eto ginjangna. Au pe ngada na utaon be arena madung gok tamburan dohot adanganku, bo tu dia do pe kele ubaen i?”ning Jamangampin.

“ Peto, peto ma da i na nidok muyu i angkang!” ning Jaboji.

“ Au da bo le dompak tuaek au i di topi aek i. Pala na so nianggan-anggan i dorong mera na godang au, ramban au jabat tu jae. Aropku adongdo tolung kolak au na ramban i, bana ma i, mera na nidok muyu i mei na manondong ua i.” ning ia. Marekelan alak mambegesa.

Ari le murtonga borngin, somak do ma pangaroai ni angkanta Jamanggete pabege-bege buras na murmasitutu i.

 “ Tangion kamu jolo so udokon, au pe anggo purkaro na mambuat gulaen do ning kamu, inda parcaritoan au. I ma bo lukahna, na sangkot di ranga-ranga i bo. Sakali sanoli, dung martutup jamburon, kehe mada au manaon luka, agakku nangkan manyogot do ma so usilo. Pala dabo git utaon ma i usor na i Lubuk Kandang Kudo an inda tartaon. Ke, na gulaen do ma marjimpalut i aek i. Na loja doma ulala mangaiskon gulaen i so tarpabonom au lukangki.” ning Jamanggete.

“ Bo aso do pentong iparaiskon, bo gulaen na gok i ma itual tu bagasan ni luka i.” ning Jamangampin

“ Ke au’ntong na git manaon luka do pe ajatku, manyogot do pe nangkan kehe au manyilosa!” ning ia.

“ Ah, ma ona ita ulala dongan keta le mulak, git modom ma ulala!” ning Jaboji. Adopentong ke ke sada do ma da alai marholasan.    

Medan, 11 Februari 2009

Jasinaloan

                 I maso na itom na robi, antargan di angoluan na majop madenggan suangkon gala-gala na markaombu, suangkon sarumpaet na lobot bunga. I napa-napa ni Sorik Marapi na martimbus maripul-ipul. I tano pantis tano barerang,tano na panapa-napa ibana parbanjaran ni si tuan na jaji si tuan na torop, tano na pabuntu-buntu ibana atubuan ni ri na manyaropang, sampilpil marliskang sumurat tano, tano na nigurbaki napu marlapu-lapu,  nipintas-pintasi rura panomburi.

                Saro najolo tuk ma sonangna angoluan ni angka dongan di luat i. Sinur na pinahan mompak na nisuan, martunas song mata ni onas, marranting, mardangka marparbue, Tuk jamaon tuk pangonjat ni siubeon. Saro nandiganni olat ni i pe tola ma i.  Arana’tong inda jabat lanjang angan-angan. Dia  na dapot i pe mohot, dia na so dong ulang ipatuadong. Inda le suangkon parkabang ni ubung hum na paincat-incat siadabuan. Angke anggo agiot do na nipaiut inda marna muhut na nipunjut.

                Tai sindok i, gorarna mantong jolma manisia. Nangkon be jolo nidok alak na sabanjar na saluat, salang na saamang-sainang pe marbeso do pangalahona. Arambir na samayang i pe marnagodang do Suang muse songon tokok ni gordang sambilan i. Muda di Pakantan udor gorarna, di Manambin jogo-jogo ningna, ditaan boto pakutili de i idokon dongan. Salangku asing panjangati marasing panigaina. Sundat ni na mangolu tele.Artina jamuda nangkini nidok na sonang angoluan i, idaon ni simanyolong do da i. Muda nitilik salung di bagasan roana na paasing-asing do pangirasoanna. Deba tata pe nida na dong do na solot di roania marsamohok-samohok.

                Jadi songon i ma da dongan si panise si pambasa, na martua na denggan roa. Dia dongan naingkan ita turionkon on si Katuik do gorar sapetona. Tai dongan anggo di banjar nangkinondi leng na si Bisuk Naoto do pio-pioan ni dongan maradopkon ia. Dia do le so songkon i? Arana na dodasma nida pasimbil-simbil pangalaho nia tingon dongan na balok. Tu jae ning kalak anggo ia tu julu do ning ia. Bo pe non saguman mandoksa anggo ia na marsuat di naningia do ia. Jamuda marpupu alak mangulayas marlanteh ni anganna tusia, indantong jabat na iampirkon iantures ia ba i. Lek na ro juo do ia tu jambur an.

                Muda non tibo di ulaon tong tong ma ia si pangoloi, dodasan mangankon toda-toda ni dongan. Muda topot di  siluluton dia na dumao tu si ma ia mandok parhalan sanga manjamitaon na urak bilangan. Dung songon i, inda juo merjut sanga ia mandawah. Tata de nida boi nia isuruon nayang simanjojakna manangion na maisuru.Muda naron adong na sohot-sohot na mambaen toktok ni utok-utok marsapa do alai disia. Dung idokon ia naron pandapot nia martata ma alai songon na mangalayasi, angke di alai na sihil do pangantusi nia. Ben na songon na tarpaoto-oto i, aropku i  ma da so ni dok alak ia si Bisuk na Oto.

                Sakali sanoli songoni ma da . Dompak aramianna natobang-tobang di lopo ni angkanta Jamanggete i. Sabotulna um na riburna do on, na bahatan na marutang. Jadi ke ke sada de naron painte-inte so malongon arana alangan manombo sanadeba mandok     “Tuliskon jolo angkang! Padomu ma dot donganna i!” na marutang. Muse Jamanjontir tong dompak rahang ni carito di jambur i. Margonti soluk dongan martorapan muap ni tarutung manyogi tangkuhuk niba, musim tarutung’ntong dompak.

                “ Adong do pe dongan tarutung sigaja muyu i, amu dabo um na carito sajo do, tama ni aha de i sugari ioban kamu jiba pinomat um marsaruang!” ning Jamangkilang.

                “Alaaa, sada -sada do ma boto amu. Si repes i nang tibu do abis, sidingkil na ilambung ni bondar i inda na aru upamatai, siatak batu i  pe na upajiar de songoni i di toru na i so adong panganon ni binatang,anggo situmbaga i aropku tardua nai isi, muda sijabak na donokkon batang ni potar i madung manampuk do sude, sijantung i anggo na so ituak ni pitudar sanga antalas anggo um lima nai adong do pe uida, si roti i umbahat do pe, tai sigaja i nangkinin ma pangabisan ulotap.” Ning Jamanjontir ngasngasan dongan mambegesa.

                “Amman! Nalongkop do dabo sude ragam mocom ni tarutung muyu te!”

                “Olo”

                “Abiskamu dontong nangkin sigaja i?” ning Jamangkilang marsapa.

                “ Aaa, i ma da nangkan dokononki, tai ma ipajolo amu manyapaisa, ulang songon na mangantak obar muyu i. I ida amu dontong na marampar do ma ulit ni tarutung sakuliang ni sonta i. Anggo sugari laku, aropku tonga dua padati adong do isi. Jadi na rumiam do ma lanok, lanok rata, siurkur di si. Um pas nangkin madabu bulus uoban tu toru ni sopo i. Jaaap ningia ulobong, lobong duantong i. Um kulobong na rogom ma lanok rongkon lanok rata mangaroroisa. Ututupkon mangulaki ubaen tu adangan andilongki, i bagas do ma ami pangan dot alak bagas!” ningna.

                “Ganjing do roa niba ba i, sapalana lanok rata i ma, anggo nga di nahodar na dursun sanga na rota na so tama do i inganannia.” Ning Janagkilang.

                “ Ke dongan, songon dia ma ning roamu so tarpinangan tarutung i, oni ulang iganggu lanok i iba.” Ning Jamanjontir mandok si Bisuk na Oto.Mikim-mikim kinan dongan painte ia mangalusi. Na giot manjalai partataan dontongon ning roa ni alai. I sirup si Bisuk na Oto jolo tes paet nia sandornguk baru mangalus.

                “Anggo au ba na momo de i.Ujuluk urutku dot tangan siambirang baru ubaen tu ginjang, tontu tutangan siambirangki de songgop lanok rata i, baru ma upangan tarutung i!” Ning ia mangalus sotik pe taru so alangan ia mandoksa, mangkardak dongan mambegesa, hukkek na minum marsitulbasan. Peto ma ho si Bisuk na Oto! Ning kalai.

                Anggo jiau ba dongan  akal-akal me na ibaen nia i,i ma so ugonti gorar nia i. Si Oto na Bisuk do ma gakku!

Bandar Khalifah, 26 Oktober 08

Jasinaloan

                 Madung lopus sapoken Nai Rumontan Sitombomon ronyang-ronyang so manontu. Anggo manat ipamataan tarsongon na amagoan tondi. Dia do pambangkitna  pe so binoto. Salangku jabat do bincar sidumadang ari ia pe na mamuhung do ma i bilik parpidoan i.   Ro di pamatang na so adong be ilala ia tamana, milas matondik mangindutdut, morong-orong ja na mingis-ingis margonti-gonti. Ja le ipagulung ia marulos godang manyarira rasona sibuk nia. Rasa tu kotu luhur naron taru so dong be na pade pangirasoan nia. Manombo ipajuguksa do di tangga i  mamatai alak na marmolusan taro manupek-nupeki situhuk sareto manisik-nyisiki lisa sanga gomit na mun manyitutu baen na so maridi-maridi i. Dapot tong utu mur tu tamana ma i, onyak do ma panindos nia di sisilon ni induk ni tangan nia.

                Iligi le sibuk mun marnyiang mun maringking asontong ngada angke taru so ialap roa nia na git mangan. Na bahat ragam ma gule na nipamasak ni boru nia i, bahatan na tu parik i do umpado na pinangan nia. Anggo dompak sumehat ilalasa, jabat do sumangge gule asoaso pangaroncana, manigor dosir do ijur nia midasa, tai anggo sakali on, um na idaisa do pe madung paet jana bau ma ilala ia, baen biarna doma ia masuk angin, itolonisa songkoni sampoul, sapanganan ni kocek pe ngada jabat.

                “ Inda ban ko do pe le tu saba, inang Masniari?” ning ina-ina na marlaosan i.

                “ Alla, inda pe boto, on ma bo na umitir do ulala sibukku!” ning ia mangalus.

Jabat do ningna taringot di pambaenan na mur marsak ma ilala ia roa i, alak le nang siap ma manyuan, anggo ia mambubut pe suada. Untung mantong nian sitolong ni na dangol, si Masniari doma dohot dongan sabagas nia i si Barudu na manuget-nugeti pambaenan ni na tobang ni alai i. Sude alap ari ni Babere nia i si Barudu na tu saba i doma laluna, muloi tingon na mangalamot, mambatangi, on na mambubut same do ma nian, so dong alanganna tonga dua ari nai marsude mai nian tu na manyuan.

                Taringot di alak babere on “ Si Barudu “ rupo do nian na so songon dia jabat, anggo parroa dohot pangalao taru so adong do goraon. Tumtum songon same, riprip songon bide. Ginjang so adong gotapon, pondok so adong uduton. Tutu do nian muda niligi pamatangna menek boti cecer, tai boto ale amu dongan si panise na martua na tama parroa . Menek pe ning kita lasiak lamot do on. Olo ma da sandigan, laos  giot patobang  ia i rap dohot si Masniari, sude do alai na sapanggadongan martos ni roa. Dia mantong si Masniari on boru sasada, ia ma anak boti boru. Ro di donganta si Barudu on alak Nias na tarkalilu tarkalepat so binoto do unjur-boangna on. Tai i ma giot ni Tuhanta i, soni ma takodirna, muda ro di agiotna, inda nangkan tarambatan. Bo anggo sannnari le ia na morlumna. Bo di siriaon bo di siluluton inda jabat agoan alak di sia; nayang di pangalangka, ringgas di panjama. Sada ma ia’ntong  urangna, anggo di parhata na somal ma on binaen partataan, bia mantong saro di alai an dao do marbeso dohot saronta, saro Mandailing.

                Ganop borngin, jaru pe dung lopus samon do ma ia so mulak ngon saba, laing na  kehe do alai manungkir simatobang i tu bagas pusako i, maanyapai sanga madung bia situhukna taro mangobarkon antat ni dia do karejo di pambaenan an.

                “ Aduan dabo inang, sidung ma i suanon i, ulang be sai marsak be dainang!” ning si Masniari din a saborngin.

                “ Olo nian, syukur ma da i inang!” ning natobang i.

                “ Anggo au da inang ngada na sadia jabat tohapku di si, babere ni dainang do na markasna, au pature sabantan au’ntong!” ning ia.

                “ Olo ma da amang, mauliate ma da di amu alak si babere!”

                “ Ala ula pikiko natula i, na patu jama oku ma natula i!” alus ni si Barudu.

Sip polngit nantulang nia, mangaroai, anggo babere on da na so binoto do manombo pangkobarna, bo  na patut jamaon nia muse ma iba ning ia. Ningna di bagasan ni roa nia. Anggo si Masniari mikim-mikim ia songon i, arena madung pohom do ia makasudna.

                “ Ning babere ni dainang dabo, na patut ia ma i manjama pambaenan i, baen namarnyae inang, i do!” ning ia.

                “ Oooo, ima da mauliate ma amang sanoli na i.” ning ia taro godang pangkosa nia

Mabungkas ilalasa na manguntong indora nia i.

                Mur bagas borngin ari, alai pe markiro muli do ma tu bagas ni alai an. Angke si Palit pe madung palit sajo di ambitan ni inang nia. Anggo si Torang nangkan julangon ni amang nia do ma i. Taro muli taro mangkatai alai di pangkal tangga i.

                “ Aroku dabo itabaa do ma uba ni inata i.”

                “ Bo aha do ita baen asal ma tu na padena” ning induk ni api nia i.

                “ Pira ni manusia do ma ita papangangako di inata!” ning si Barudu.

                “ Ah sip ko le angkang! Ibege inanta buse naron bo martamba ronyang nia i

                “ Aso si… aso si!” lek ning ia manongkari.

Inda be ialusi ia, isaratkon ia do ma tangan ni namarkayaon ia i mabiar ia binege natobang i.

                Bo aha do le, ampengan na binegena do rupa. Git manyongkir ilala ia gayokan boti mapancing ia mambegesa. Muda nangkan pira ni manusia ma le baya  nangkan panganonbaen ubat nia. Marsak marjeng natobangiI saborngin i, sampitpit pe nga tarpodom mamikirkonsa.

                Um na torang sigat do pe sidumadang ari, tolap ma si Masniari tu bagas ni inang nia i maroban pira ni manuk siam.

                “ Indon bo le inang ubat na nidokon ni babere ni dainang i!”

                “ Bo on do dabo na idokon ni alai i, uagan dabo sanga na aha!”

Medan, 8 September 2008

Jasinaloan

             Au dongan, pala uparorai upamanat upasari-sari, bo di ari manyogot  muda dung tarsonggot laos marngiat-ngiati, sanga pe di potang ni ari dung solpu maridi, laos samon ni ari diamumuli ni situmorus kabong mangalului parpidoan, manombo boto (dung jumolo marsantabi) dompak mangatur de taringot, atia mangayup na solot-solot anso ulang tobot be sanga sosot na itotang ni pusot  sanga ngot-ngot.mangungkap alot. Manombo dompak di sabaan do dongan, dompak marlaya manggaor itobatta na tar marpaya i, mekel de au songkoni sasada au mangaroaon na marnamocom di utiutian i. Nabahat do ulala kele asomalan ni alak ita Mandailing, asomalon na tinadingkon ni ompunta na dung jumolo sundut, na ita pauman-uman lopus tu ari na sadari on.

            Dia ma nangkinondi asomalan na udok di jolo ima satontang di na mambaen ja na manjalai sonang ni roa. Arana jaru pe na tabo panganon nangkan silamoton, jaru pe na tonggi aek siinumon, suang ilu ni silumambe bulung, anggo na so dohot sonang ni roa do mangarasoina indangkan na mangoban sonang ni roa. I ma so nidok bulung botik pe mardai mera, atia na mangankonsai rap sonang pangaroaina, tata boi inda markilim-kilim, ato pe matucekcek sanga pe marbirungut-birungut. Jamuda pe na gule mera ma nangkan pinangan i anggo na mandemes-demes do pangoloina ngadangkan na tabo i sipanganon i. Angke dila um na mandai do I anggo sapetona ateate do na um peto asa na um reso.

            Sakalai sanoli, di alasan ni sidumadang ari marsalimpotpot mangusa langit na mangarata, di aloloja ni bujing partonun pasingkop sayup sitipaon, di angunguas ni bayo panopa, di aruruncur  baju ni bulu sanga bulung ni torop na tobang; jomba tu amun jomba tu ambirang,

                   Au dongan marjanji do ita parjolo, muda sala sangko mardosa. Ulang iagan kamu baen urgitku. Au dongan um na sianyang um na uti-utian do on. So do ma adong parkalilion ni dongan na tininggang ni arsak arjeng boti situhuk. Aropku dung tasise sisean boru ni siguriton on, dumao ma arsak, dumonok ma tata, ulang be marbeut-beut, ulang muse mandemes-demes. Angke aha ma jaotni i. Muda na sulaha roanta  mangkardak matukakkak-matukikkik, pinomat ma mantata mokol-okol, muda ngada tarbaen mantata, sasuadana ma mekel-ekel, muda i pe inda bolas, mikim-ikim pe tola ma i. Muda inda juo  dongan  uyom- kuyom pe jadi ma i, anggo inda do pe ra au pe jora ma au, aropku inda be ubat na so martarimo, anta badan do ma na so be margayok…ita patulbaskon dongan!

                Maupok baya tandiang

                Parasaran ni borong-borong

                Mamokmok sugari na marnyiang

                Asa malum na morong-orong.

                Na jolo di atia na so marmaso di ampung na so margorar sindok ni bayo parjamita on. Di atia baboan madung marsude, toap madung sidung. Adopentong um na di bagas do ma karejo ni si Tiomas boti rap dongan na sapodoman, si Taing Karujut, i dongan goar tuasan do i. Anggo gorarna sapetona si Masniari do, tai binaen kariting ni obukna, bo mohot ma gorar i sian na menek lopus sannari. Aha mantong karejo ari-ari maos-maos di bagas ma songon i. Loja marmayam margulung-gulung, loja songon i manyisik lisa sanga gomit na manggulmit. Tarantongkin do nasida mambaen pangan-panganon aha do na kasirok di roana. Manombo mambaen lopek, natuari manduda marsidua mambaen sasagun, inda pe lalu sasagun itak poul-poul ma pajolo. Anggo mangarabar sanga mandaisi ulang be ni dok, marsude rindang ni sibodak bubur na di parik i.

                “ Aropku dabo tu Medan   do ma ita jolo marlancung. Arana saba bangunanta madung sidung ma tapature, sabion na lolot do pe!” ning si Taing Karujut di na sadari dompak margulung-gulung alai di bilik.

                “ Bo pade do ba i songon na buang-buang rintop, adatna lopus do pe tonga dua baulan nai anso manyabi. Arana na laos marboltok do pe me, lopeh marboltok baru aruar, tingon i tu na bibi lopus rungrung ra do dua poken, ngon i tu na munduk lao gumorsing dua poken muse. i ma so udok tonga dua bulan.” Ning si Tiomas mangalus.

                “ Olo marsapa ma au jolo di damang na tua bulung i, anggo bolas do disia pade ma i. Au pe na lungunan ma ulala di namboru”

                “ Eee, ulang dongan songon na mangantak obarmi, inda le lilu ita ning roamu i”

                “ Aso lilu, ois, na pambirik ma ho taing, muda lalu ita tu Medan ita tengget becak, ita dokon tu Galugur, isi ma bagas ni namboru Sangkot, i topi ni aek itarsatonggak do lao ngon jamabatan i. Nangkon ko jabat rusak patunda ni i, au me tu si!”

                “ Bo, nga ben pambirikku da, biarku lilu ita , bo golam-golaman kita i Medan an, sanga igadis kalak kita jongjong!”

                “ Ala pos ma roamu, tai ho pe sapai majolo amanta, anta naso ipatolasa do ho dohot!” ning si Masniari.

                Sapoken dung lopus parkobaran ni alai i, binuat ma kartis ALS. Nasida pe marsiap ma pature  silua. Na bahat do boto raum-rauman na. Adong indan simanis, kipang dohot kipang kacang, rakik-rakik, isi do pe kue bika. Lain ni i adong do pe maroban arasak, ian sale dohot gule apesong asa karupuk ciak, inda muse lupa palastik marsapulu be, ngada binoto muta idalan, bo sorat do jabat jingjingon ni si mangido. Alai pe markas ma paias pamatang boti pakean, arena nangkan marmedan on antong anso ulang marundut tu iba tarida.

                Ari Saptu malom akat dung solpu kotu mangorip rap rim malai na dua bagas tu kantor ALS an. Simatobangna inda marnasude marsipaingot anso jago boti jimat alai na dua. Bia mantong boru bujing on nangkan pabuatonon. Inda tardok sanga tarbia pangirasoanna, sambalik jop roa arana nangkan mangulangi sisolkot, simbalikkon i marna mocom ro uos-uos di bagasan roa. Adopentong dung sude barang-barang ipanaekkon sitokar i motor pe marangkat ma…

                Siabu ale Sigalangan

                Sitamiang laos paulu

                Siamun baya marsijalangan

                Siambirang pangapus ilu

                Dompak so tolap tu Sidimpuan na bahat do obar-kobaronkon ni alai.

                “ He taing ipamatai ho de nangkin sitokar i?” ning si Masniari.

                “ Bo mangua lakna “ alus ni si Taing

                “ Na sangkal do uida pancelok nia nangkin tu ho, songon celok marisi”

                “ Huh, te isia, um kondal ni baju nia,  manyulbak butuangku midasa, aropku anggo ikalantang ma marmatean de i gulaen salubuk”

                “ Bo umpado tukang takik!”

                “ Au ba dongan tumagon do pe dapot au tukang takik, anggo sitokar i M majolo dongan!”

                “ Puda  tukang takik na bauan i , muap kantalan!”

                “ He na bau i do boto ho na ahai ilala alak!”

                “ Ois leh, urgitna ho!” ning si Masniari sareto manodik ak si Taing, rap mangkair kalai na dua, alak na di motor i sude mamatai alai na dua. Ilana ngada tarkiro.

                “Ulang kamu le magaor tu inang, sanga marmara ita naron!” ning anak boru tobang na juguk ipudi ni alai i. Mangago-agoon ailaan i, ipasuang kalai do ma songon na modom taro patangi-tangion ende-ende na nipatik ni sopir i. Endena pe subage na nialap ni roa ni alai, biamantong um na logu dangdut sajo, somak alai mambegesa taru so unjung ende Mandailing, sasuada-suadana sugari dumenggan do pe sora ni ende ungut-ungut, jeir sanga gordang sambilan. Lolot lolot songkon i, bo muli-muli modom tong nian nauli bulung ondi.

                Tarsonggot alai manyogot, madung tolap tu Parbaungan. Pula umj satonga jom nai, tolap ma tu Medan. Pamatang pe mun so tama ma rasona. Jaru pe manyogot tai mompap songon i rasona.

                Tolap tu Medan, tu kantor ni ALS an, i jalan Amaliun do pe maso i. Raimbur mantong marsipature barangna, adope ro ma sadalak parbeca marsapa;

                “ Mau ke mana Dek!”

                “Mau ke Galugur, berapa ongkosnya Bang?” ning si Masniari saro Malayu (marpasir-pasir)

                “Ayoklah, sepuluh ribu aja!”

                “ Ah yang mahal la itu, biasanya tiga ribunya!”

                “ Wah, tidaklah Dek, itu dulu, Simpang Limun saja lima ribu!” maso intong dongan saribu do pe kantalan sakilo. Tai sondia pe panawarna inda ra bayo i murak tingon na sapulu ribu.

                “ Ah, keta ma le, padiar songon i so isosop bayo on naron na sapulu ribu i!” ning si taing.

                Manaek alai tu beca i, taro longang-longang dabuan rimbang mamatai na so unjungada tarida sareto marnamocom mamurai parbeca i saro jita. Sip tong songkoni bayo i, ihaskon ia na mandayung beca nia i.

                “O, taing” ning si Masniari

                “ Mangua do dongan!” alus nia.

                “ Maraek do ma uida ilala bayo on na mandayung becak on!”

                “ Aropku da indsa be um na maraek, mangkagisgis!” ning si taing taro matukakkak alai na dua marsitutu, marsambaran pangecek ni alai.

                Lalu tu Galugur tarida ma di si Masniari jambatan Sungai Deli,

                “Berhenti bang, sampe di sinilah!” ning ia.

                “ Ini ongkosnya Bang!” di lehensa tukaran dua pulu ribu (maso i.,i ma tukaran na gumodang)

                “Makasih ya Dek!” ning bayo i, sareto git kehe

                “ He, pengulaknya lagi Bang, tadi kan sepuluh ribu!”

                “ Ala anggi, marpangulak do pe langa, ke dongan maraek do ma ilala abang, mangkagisgis dope adi ning kamu, bo ibo ma roamuyu di iba!” ning bayo i, alak kita do rupani.

                Illallah….na alak kita do ape, na idosing ni alai  doma so tumibu morot ngon lambung ni bayo i, anggo liana ngada be tardok, ima so ulang malancartu iba

Medan, Februari 2008

Jasinaloan

                 Au manombo, muda uparorai dompak sasada au, mokol-okol do iba paingot-ingot angka na aha na  dompak taringot satontang di na gaduk-gaduk nagidik-gidik na tarasoi atia mian iba ditaan. Git mangkardak iba matukakkak sulaha ma roa paida dongan na dua tolu, mabiar iba bo ni dok dongan iba non na dung senu, baen i ma so uantan do songkoni tatangku, manombo boto amu dongan marrobakan do ma ilu niba manaonkonsa.

                Na bahat ragam dabon’tong utiutian ni alak kita Mandailing. Na rumo boti sumurung lobi do sian alak na leban. Au le, na bahat ma au mardongan marosu dohot alak Malayu Darek na sadarekna, Karo, Jawa, Acceh  dohot na asing-asing, na so dapot au do songon parange boti pangalaho ni alak kita, tarutamo satontang di utiutian. Inda dabo  marnasude, ngon jambur na sada tu jambur na sada, songon i di pancur paridian, songon i muse do di podoman parpidoan bo pe i balatuk sanga sendal ni opuk pardomuan parrosu-rosuan adong sajo do on na mamangkali. Inda jabat marjanto adong muse ma on na manambai sanga na mangatehi, songon dia so rap ria roa rumiak-riak manjalai sonang ni roa.

                Sannari don’tong na bahat caro na pasonang roa. Anggo sa dan i bo di aha de i. Beso na da, molo sannari  bahatan na mamatai, manjuak-juaki do sinaloan ni dongan, dung i non baru ma mamunten taro manggorai na nibaen ni dongan na balok, suangkon na mangaligi na marbal, ummalo do sipamatai, sura-sura ia ma na malona, tai ba anggo garina ia ma na manyipakna i inda na um na aut, cipak nia pe na lus do. Dung i maniru aha na masa na muba. Dodasan lupa jabat parorai lagak na patut ato so patut do sitiruon sanga mambaen pangalaho na muba joho. Sumurung lobi do on di pamake sumuangkon mambaen arambir na muba sabut, boti babiat na tarida bolang.

                Anggo alak na jolo, jamuda alak karangan ma jolo tamana dokon on, martaridaan pe le pamatang, marpataran “AHA” ni alai baen suada na do sigobakon. Ro di saonnari inda le na urang sipakeon bo pe le na monja do merekna tarroaon dentong pado pakean  na sumanan do ma na salang-salang, manombo inda tarorom na so niligi, ois leh! tias ni purogos na mangimpal do na tarida.

                Marsimulak muli ata ni utiutian on tu toras ni ata na parjolo.Naingkan i, dompakmarsiajar maposo do pe iba di ita an. Adat maposo sandigan i, na so tama be iba modom marsipidoan di bagas niba jabat do saut umur niba tu na marsiajar maposo. Di utanta i bahat do sopo podoman ni naposo bulung, sasuada-suada ni podoman di ginjang ni opuk pe binaen do i.

                Ami na sapodoman adong do onom alak. I ma au, si Capot, si Sangkot, si Dapot , si Lokot, rap rongkon si Moncot. Songon sindok i, saban borngin mocom do sibaenon manjalai aha dalan na pasonang roa. Marmi, marturup, mardobol, manombo telehe (ulang  ba ita dokon-dokon) manangko manuk pe na baenon de i. Manuk nise ma le ning kamu, bo lek na sisiolkot niba juo do ba, i ma anggo ipasari-sari sannari, mapancing iba mangingotsa.

                Sakali sanoli, dung rap loja be marturup sisinggang , naso nianggan-anggan mangkuling ma si Moncot.

                “Aropku da bo marsipatidaon abetenganna doma ita jolo, so nidan’tong!” ning ia.

                “ Bo, maradu beteng songon dia do, anggo marpanca, pir te muyu dayuk ulu        muyu, ngangkan na tolap kamu au i!” ning si Capot mangalus, peto antong ia ma ami na onom na tumogos.

                “Alla anggo gogo dontong patujoloon inda na dong jabat aek cimpola ni i, angke orbo ma sada binatang na gumogo, aha do diida ho Capot, maos- maos isarat-sarat iloncingi dongan do, merdet doma ijur i di na manarik padati i.!” ning si Lokot.

                “Jadi aha do anggo songon i?” rap ningna be.

                “Maradu beteng muntut!”

                “A.. na suada ma dongan toap i!” ning si Dapot taro mopeng-openg tingon susui i.

                “ Ulang’tong songon i, muda na so lalu amu dokon kamu, mangaku talu amu, ulang bahat sidalian muyu!”

                “Bo, songon dia dentong mangukur i, naron marsidok- naidokna untut nia ma na gumogo!” ning si Moncot.

                “ Inda ba, sannari songon on ma, ise na monang margonti ita mamisat-misatina, so binoto untut nise na gumogo, i ma bo palito i, untut nise na bisa mangintopina ia ma na monang” ning si Moncot. Ami na lima rap marsipan mangaroaisa.

                “Ah, tacubo pe jadi!” ning si Lokot songon na olas roa nia.

                “ Bia do Capot?” ning ia.

                “ Nga marimbar!” ning ia mangalus , songon i muse na asing-asing.

                Nipapondok ata, ipatutonga palito.

                “Adope dongan, ho ma pajoloon!” ning si Moncot adop au.

                Ubuka saraorku uoroi untutku um na dopes do, mirjop pe ngada palito i. Paduana si Sangkot ipastak ia ngada jabat na marbut, ima ia na lumobi bauna , manyaliuk doma rasona tu igung niba. Dung ibuka jolo tingkap santongkin so mago bau ni untut ni si Sangkot i, giliran ni si Lokot do ma. Iuntong ia osa nia, marpupu ia mangoroi aha pe ngada, inda ra muntut. Lopus i si Capot do ma. Puuuut, ning untut nia,ampir doba mintop palito i, tai ben donok na ipasang ia muap abong na mosok doma podoman i.Adopentong dua nai do ma, on si Dapot jolo, inda jabat nalolot ia mangoroi, isingkat ia abit karung nia, ipaunggil ia tu palito i, taro ipatopot-topot si moncot sian pudi, perek pek pek pek pek preeetttt…! Mintop palito marlamutak te, si Moncot pe moak-oak sap sude sibuk nia tarte. Aha do rupani na morus do dompak si Dapot. Rap mangarangai do ma manjalai dalan aruar arana mang sap do te di podoman i, maridi do ma jolo tonga borngin i.

                “Adope pisat-pisat kamu au!” ning si Dapot

                “Nga bisa ba i, markicu ho, untut do ningku mangintopisa , te do ibaen babamu!” ning si Moncot, anggo goyakna roa nia inda be upalanjang-lanjang. SUNTUT!

Tombung, 21 Okt 2008

Jasinaloan

           “ O…inang ni si Puhutan, dokon ji alaklaimi, ulang se itastasi ia bulu parapat na i lombang ni dalan i, oni ulang itakik-takik ia koje na i lambung ni sotul i, na i koje na i Aek Sombaon an. Inda amu puna i, amangku do najolo manyuan i so iboto amu” ning Jamanondong mangupar-upari mandok dongan sabagas ni Jaleto i jolo ni lopo ni angkanta Jamanggete i, ari Sabtu arian raya mandonting laos muli ibana tingon onan Hutanopan.

                “ Aha ningmu angkang?” ning  nai Puhutan, anak boru satonga tobang i, salao patibal kirang dohot buntil na nijujung nia i. Alak pentong ro-ro sada ma mamatai ulang so mamboto aha na muba na masa so do ma ulang katinggalan, idokon dongan  iba non ulang madao tu ngon lonceng, sumurung lobi ma Jamonis, apala ia ma na gosona.

                “ Olo.. dokon di alaklai mi ulang itakik  na so koje niba, sanga tos ia naron usamboli ugotap dua!” mur gara ilalasa.

                “ Nagaduk ma da o angkang, au le inda tukang takik au, dia ma baya uboto-boto i, muse naso binoto do unjur boangna burangkitko tu iba.”

                “ Na gaduk ning oldatmi, alap alaklaimi tu son, inda ho alongku, na so labo!” ningia muse mur masitutu birat taro mardabu-dabu onco ia mandokon ata teas ata jampolak.

                “ Olo ualap pe muda na git gotap duaonmu, gotap dua ma so sombu roamu!” ning nai Puhutan mandemes-demes iompotsa muli tu bagas mamio dongan sabagas nia i.

                “ Mangua do naa dongan, na santing kuida dabo gusarna ilalaho, aaha do la I na mangua Jamanondong !” ning Jamonis.

                “ Olo lalaho, ben na sip sajo au saleleng na on mur manjadi uida ilala ia ro songon na mangulayas , inda iboto ia na uimpankon de i salolot na on.Anggo au do inda gasgas  na itabusan i parkobunan nami na sannari onan, tingon ompung ni ompungku anta nang piga-piga sundut pucako nami  samatua ma i, on ro ia songon na git mangkuasoi, botoan ma ilalasa diparbalokan umpado au, aha’ntong su gurgur mudar niba!”

                “Amman, jabat do dabo songon i ke! Songon na pabile-bileon tong ke!” ning Jamonis mun nipaipul ia purun na i indora ni Jamnondong i, indantong ipatuba ia , petoma Jamonis, parangena suang do pidong jobi-jobi pangalap panaruon. Binoto do Jamanondong on na parnaek kipna.

                Inda jabat marjanto tarida ma Jaleto ro ngon dolok rap dohot dongan sabagasna. i pudi nai nabahat muse do na mangiutkonsa suangma na pabuat boru. i lopo i pe  na mun maribur ma na painteon sanga aha nangkan liginon.

                “Jago ho da dongan anta na manyambung tangan do ia naron bo sambaing kita” ning Jamonis lingon-lingon iusipkonsa adop Jamanondong.

                “ Icubo ia mantong uida, anggo tu ao non martontu de i.” ning Jamnondong taro manyingkat tangan ni bajuna.

                “Mangua do lakna ningmu Jamanondong, so birat ko marsitutu di inang ni danakku, dadaboru dontong iparalo ho, monga do naa?” ning Jaleto

                “ Ulang monga do naa ningmu, ulangko marpurak-purak.”

                “ Marpurak-purak bia de he? Au na siubak pisang do dot au, inda jiau i markulum-kuluman, dok dokononmu so rap tabege, ulangko pabolak-bolak padang tambalon.” Ningna.

                “Aso irasrasi ho bulu parapet na ilombang ni dalan i, oni ulang takik-takik apeangku na nilambung ni sotul i. Inda ho puna i!”

                “ Aso nga au puna, au alak sipanabusi do au. Pandokon ni Jarintop saguman na I lombang dalan ia nampunasa, muda inda sonang roamu sapai Jarintop!” ning Jaleto ia pe muli-muli manaek seh nia.

                “ Sip babamu! Ulang ko se manjawab inda taon jangekmu naron, tiopi amu au mate ia naron ubaen!” ning jamanondong git mangambur tu Jaleto. Ro pe Jaleto songkoni. Bulus apuan alak maniopi alai na dua anso ulang jabat marsitanganan. Mur mabahat na mangora mun so tarora, mur mabahat na maniopi mur manggurentak-gurentak aduana.

                “ Hus na so maila ma amu na dua, suang kamu uida songon daganak!” ning Jamanggete taro aruar ia ngon lopo i.

                “ Olo ia do angkang na mangupar-upari, au na sip so do au, tai anggo baen git marbada ma giot nia au pe na tapengku de i. on nagit gotap duaon nia ma au ning ia!” ning Jaleto.

                “ Ima da singgo itakik ko do pe apeangki ugotap dua ho” Ning Jamanondong.

                “ Gotap dua ma, ari sinayan on tu kojean do au, gotap ma pula na gotaponmu!”

                “ Inda ari sinayan au tu si , ari salasa do au tu si!” ning Jamanondong.

                Ngada be da be, angke um na jungalna do andigan de i antong marsigotapan anggo na so pasuo, mulak- mulak sada alak tu bagasna mekel-ekel, ro Jamonis na holas ma ilalasa arana inda lalu na ijajang nia i bo aha do untut tu te do, te tu burus. Mintop palito abis carito.

Medan, 10 November 2007

Jasinaloan

            Targan painte-inte Jumahat, i bangku-bangku na i jolo ni opuk ni Lobe Kotan i. Adong do salapan alak ama-ama na marjuguan di si. Anggo lobe  i na dung lolot do ia kehe tu musojit an, bo pe na so mangkuling do pe  tektek marpio-pio mandokon na dung donok ma atia nangkan sumbayang Jumahat. Somalna dua noli nipalu tektek ( tungtung) i.

Parjolo ira-ra pukul sabolas idanggur mai sanoli, marjamita di situan na jaji- si tuan na torop anso do ma marsiantak jamaonna, anso maradian tininggalkon sibaenonna. Paduana ima laos manaek naron kotip mambaca katubah.  

            Tai bo pe nadung rintip boti tama pamudun ni padan na nipapadan-padan i, anggo sadebana ngada jabat na iantureskonsa. Anggo pandok ni lobe i, muda madung undul do iba bo pe namarsila-sila, ato pe na mangaji-aji antargan so bahang na parjolo saulu ni orbo boto pahalona, muda dung manaek kotip i, saulu ni kudo pahalona, tai jabat sidung katubah na pajolo saulu ni ambeng doma dapot, muda muse um na mandoah do ma dapot ngada be da be sapira ni manuk doma dapot pahalona. Au ba dongan pandok ni lobe i doon, anta na peto, atehe na sala , ia ma dongan  sapai amu sanga tarsongon dia do rarena carito nia i. Anggo au do ngada jabat na pohom au I sanga bia do unjur boang ni i. 

            Songon i pe dongan  antat ni kaji do ba i. Na lobi tagi do nidaon ilala na tobang-tobang i mangkobar-kobari laos-laos sumbayang jumahat. Anggo tingon bagas nian tibu do ia buatna, tai anta na piga noli na i naron maradian i topi dalan.Melpas majolo mangulaki ata ni utiutian on tu jolo ni opuk ni lobe i. Suang doon na dung  rap marjanji anso marsipaintean di si. 

            Dung songon i naron, marmungkapan ma obaran na sagalo mocom. Manombo na marroncaman do obaran i. 

            “ Mandaek do amu nangkin angkang?” ning si Jamanaon.

           “ Mandaek mantong, anggo nga da mandaek, bo aha dontong parpokenta cogot, ke na poken ma incogot.

            “ Dapot kamu do piga ember di takik on na i tandikek an ?” ning si Gundur muse.

            “ Sapoken on dua ember do dapot, arana dua do aringku tu si”

            “ Bo na bolak do dabo koje muyu i ke!”  

            “ Inda nian ben bolakna, tai sindoki, tarmaraek da bo ahanta  i ”

            “ Ulang kamu le roncam dongan ita na giot sumbayang, tarmaraek da bo ningna

ubege aha muyu i. Anggo jiau boto amu na simbil do on antusan ni na tarmaraek on. Aropku dale mandokon na tarparaek do amu i.” ning Jagoya.

            “ Amu pe da na sise ma amu, olo tarparaek ma da apeanta i, i do makasudku!”

            “ Bo nang deges do ba koje muyu i i. Arana’ntong  ulang songon na mangantak obar muyu i da, bo dapot kamu saember sadari.” Ning si Keneng.           

            “ Anggo taringot di paraek ni koje ngada na bana do pe ba i!” ning Jagundal.

            “ Bo bia so songkon i ning kamu?” Ningna  si Keneng sapa-sapa.

            “ Au nandigan targan so itarik namora i koje na i Aek Karlan an ngon au, adong do sabatang i si apea lambou, ra do urang sotik na i do ma so sakilo pandapotanna sakali mangguris, ngantong najebu i ilala amu?” Ning ia.

            “ Bana na da i, sugari au bo, ubaen do ma i gota tahanan, laos-laos ari rayo baru nisusukan sareto igadis baen pararirayo ni daganak!” ning Jagoya.

            “ Au ba ke, anggo hum na songon i do pe na nida muyu, satontang paraek ni koje, inda na homang au jabat pabege-bege i. Unjung do icaritoon koumta di au na tingon Mandailing Jae, satumba ning ia sakali manakik, di na manakik na i pe angkon na maradu ipas do, arana um maturgis non ulit ni apea i na mapistak ma bulus aek na i suang do ma na nipancurkon. imantong, koum ta i na tingon Runding i, bona bulu ni Parinduri asa Rangkuti i, parbabiat i. Tar lima bolas batang do takik on nia na cukup ma poken-pokenan nialai. “ Ning si Gundur, mangkapistak do ma ijur nia na marcarito i.

            “ Ah ho da bo lae, na mahebattu do ubege jamita mon na peto do on dongan?” ning si Keneng.

            “ Bo asontong nga peto, ima ia na lolot mantong dung umolip koumta i, jadi ngada tarsapai ita be ia mangulaki.” Ning si Gundur.

            “ Tangion kamu jolo so udokon, au ning roangku anggo aek ni apea do ning kamu le, inda dong ning  roangku alo ni apeanta i. Muda iida amu do apenta na sabatang na itopi ni tobatta i. Muda nipamataan ngada jabat na godang batangna, muse na ranggas-ranggason do nida boti marsahat-sahat. Tai anggo aekna do ning kamu, ngada dong i alona. Au nabahat ma ujala-jalai dasar na godang, inda dong na so lilisan, marlonlan do ma tu tano i baen situtu ni aekna. Sibaen i tano i do ma ukali ja na ubaen songon kulak-kulak anso tumampung gota ni koje i. i pe da sada de i sitirripna. Sakali sanoli ucubo ma ubaen dua sitiripna, pala ning kamu atia na giot mandaek utatap ngon dao ma bontar uida sude aek ni tobatta i, bo rupana, baen gok ni aek nai matolbak jabat kulak-kulak panampungan na i, use sude tu tobat i, padohal dompak iparsaba tobat i sandigan sasuat same I tampilanna.” Ning Jamanaon. Sip sude ngadong na seranan.

            “ Keta le komat ma ubege !” ning Jagoya. Untung mantong donok do opuk ni lobe i tingon musojit, binege do pe sora ni na komat i.

Medan, Februari 2009

Jasinaloan

Kelompok etnis Mandailing mempunyai kitab tradisionial yang dinamakan pustaha. Surat Tulak Tulak (aksara tradisional Mandailing) dipergunakan untuk menulis pustaha.

Pustaha yang terbuat dari kulit kayu, atau lak-lak yang dilipat-lipat, dan ada juga yang terbuat dari satu ruas atau beberapa ruas bambu.
Pustaha yang terbuat dari kulit kayu yang dilipat-lipat biasanya berisi mantra-mantra dan cara­cara penyembuhan tradisional, ada juga yang berisi ilmu perbintangan (semacam ilmu astrologi), ilmu meramal, dan ilmu-ilmu gaib. Sedangkan pustaha yang terbuat dari bambu satu ruas atau lebih, biasanya berisi tarombo atau silsilah keluarga.

Menurut Harry Parkin, dalam bukunya yang berjudul Batak Fruit of Hindu Thought (1978 hal, 102) tanggal yang tercatat sebagai tanggal pertama kali pustaha didapat seorang kolektor merupakan satu­satunya bukti mengenai usia pustaha. Alexander Hall menyerahkan satu pustaha kepada British Museum pada 18 Mei 1746. Itulah pustaha tertua yang pernah dikenal. Dalam buku yang sama Harry Parkin juga menjelaskan bahwa gaya bahasa yang digunakan dalam menulis pustaha dinamakan hata ni poda (ragam bahasa nasehat). Hal ini berarti semua pustaha (yang dimiliki berbagai kelompok etnis di Sumatera Utara, seperti, Angkola Toba, Simalungun, Karo, dan Fakfak) menggunakan gaya bahasa yang serupa.

Menurut Voarhoeve, gaya bahasa tersebut merupakan satu ragam bahasa kuno dari Selatan (Mandailing). Pustaha dari daerah lain, seperti Toba, Simalungun, Karo, dan Fakfak, tidak ditulis dengan bahasa yang murni kelompok-kelompok etnis tersebut, tapi ditulis dengan ragam hata poda yang dicampur dengan bahasa etnis yang bersangkutan.

Fakta yang demikian ini men­dukung kesimpulan yang dicapai sebagai hasil perbandingan tu­lisan-tulisan dari berbagai idiom bahwa bahasa yang dipergunakan menulis pustaha mendapatkan ak­saranya dari Selatan (Mandailing). Ragam bahasa poda terkait dengan ilmu-ilmu gaib para datu yang menghadirkan berbagai problema linguistik. Masing-masing datu mempunyai jargon atau sistem singkatan bahasanya sendiri.

Masing-masing ilmu gaib mempunyai terminologinya sendiri yang tidak digunakan dalam bahasa sehari-hari, oleh karena itu tidak dipahami secara umum. Biasanya hanya datuyang bertanggungjawab atas penulisan pustaha, dan yang dapat memberikan suatu penjelasan yang penuh dan jelas tentang isi pustaha.

Suatu perbandingan mengenai aksara yang punya persamaan yang digunakan untuk menulis pustaha, bersama dengan fakta bahwa bahasa poda merupakan ragam bahasa kuno dari Selatan (Mandailing) memberikan petunjuk satu pola perkembangan dari Selatan ke arah Utara. Isi pustaha menunjukkan rasa tertarik yang jelas terhadap konsep megicoriligious (konsep sihir-re­ligius).

Sumber: http://www.naulibasa-magz.com/adat2.html, diakses 12 Maret 2009