Tarte

               

                Torang-torang dangka, di na laos bincar do pe sidumadang ari panaili ni langit manyondangi portibi, sian abincaran lopus tu alusutan, tingon purba sahat tu pastima, sian anggoni tu manyabia, bo pe ngon dangsina tu utara, sang ape tingon irisana tu nariti (nidok do on desa na walu) nangkan on sude do sumirlak-sirlak muda dung marnyanga-nyanga sinondangna. Um soto lopus do pe kotu subuh. Tingon bagas na sada tu bagas na sada tarbege ma maturapak mambukai tingkap asa lobu ni manuk. Songon i buse sora ni na mangkuhur matuurkur dohur-dohur, boti sora ni losung dotung-dotung anso ulang muap losung bulung gadung i. Muda di bagas na martarup seng abegean do sora ni alintaktak matutaktak marantak-antak.

                Niligi tu ruar ombun manyorop, ngalina manyogi songon na muldus doma rasona buhl-buhul i, mambaen nalosok mur ma malosok, markujajing do ia gulung manyuhung mangulaki manarik ulos. Anggo di na ringgas ba madung muli do ia manjala tingon Batang Gadis an. On ma na nidok santampul dua lancim, santaba dua marobo, arana sibuk le mun maias baluang pe marisi garing, siating sanga na lonjing pe tola. Manombo cencen, siroken, lelan sanga baung pe inda mangua tuk ma i lompaon, so adong dongan mangan.

                Si Cenek (Jabindoran), dongan nagkan tajamitaon on madung lolot do tarsunggul modom, dung sidung nangkin sumbayang, madung tarlayansa do piso takiknia aduana, arana nangkan mangguris torus mandaek do ia sadari on. Nai Tambat, dongan sabagasnia

Dompak markacak manyonduki indahan taro manggaor-gaor gule, gule tunas ni kohol na tingon Simandolam mambaur asang muring marpangaronca ulu ni barbarian. Uapna morlum-orlum tingon tataring i. Manetek ijur ni si Cenek tu bagasan, girdoan ia giot marsilamoton.

                “Inda pe laa masak iang ni si Tambat?” ning ia marsapa.

                “Sootik nai angkang, urang lampot do pe ulala asang muring na on”

                “ Ulang dabo jabat torangan ari iba so manangkok, na dao do pe boto ho dalanan!”

                “ Amang, git tetek lala au !” ning si Tambat tulambung ni amangnia.

                “Bo le baya, keta ni patibu !” ning amang nia, taro manompi sinuan tunas nia i mopop-opop tu kulak an.

                Dung lalu tu kulak paridian , na padonok-donok rongkon partuaekan i, apenganan madung juguk do di bangku-bangku papan panopian i topi dalan laos mijur tu jamban i donganna sangoncap, si Tautan.

                “ Bo, na i son do amu lae, inda manangkok kamu langa sadarion?” ning si Cenek, mandokon si Tautan.

                “Manangkok do ba, anakta tuaek i si bo!” ningna mangalus.

                “ Au pe, on ma bo! Adope ke ma ni tu si!” ning ia mandokon pinompar nia i sareto mambuka saraor ni danak i, bia mantong urang lobi opat taon do pe umurna, bali so bali do on dohot anak ni si Tautan na dompak tuaek di jamban i.              

                Rap juguk ma alai na dua taro mangidup taro mangecek mangkatai .

                “Piga ari do takik muyu sapoken on lae?” ning si Cenek mamuloisa.

                “Inda na piga ari jabat ipar, te pabagaskon moranta i i Manambin ari akat i, mangarti ma amu inda na targarar utang niba di si.

                “Bo, sundatna ma ba i, te mora na so gakgakon, utang samatua. Pamasak gule tinggaung do amu songon i .”

                “Olo ipar, te ba na dao do ulala pangalapanna i lambung ni Tor Mandagangan!”

                “Tar songon dia do rupana parbulung ni tinggaung on lae?”

                “Au pe da songon dia ma ningku, inda adong ning roangku dita on, nabahat luok ma na ubolus uloloi um di Manambin an ma ia uboto na dong na songon i.”

                Lalat alai na dua mangkatai taro painte-inte pomparanna na tuaek i.

                “Pasigop bo!” ning si Cenek.

                “Olo ayah!” mangalus anakna ngon jamban i.

                Ngada sadia lolot nida si Cenek jumbol ma danak ngon jamban i, bulus apuan ma ia mijur git mamasu te ni danak i, anggo ganjingna ilalasa ia ngada tardokon, tai biama pompar. Bulus itiop ia tangan ni danak i salao ipadonok ia tu pancur ni kulak i, iuras ia urut ni danak i dohot tangan siambirang nia. Kentong taru na so sajo danak on, inda mangkuling, inda manggulit, ranan manyikur songon na mabiar.

                “Aso do sipso sajo ho?” marsapa ia heran ilala ia, somalna na bahat do kecek ni anak nia i. Bauna ilala ia te ni danak i tukma.

                “Aha de i ayah!” ning si Tambat todingkon  jamban nangkinondi.

                Tarsonggot tarkorjung si Cenek tarkalimanman tarkalimunmun. Aha do rupana ngana anak nia nangkin na nibasu nia i.

                “Sobar kamu ipar, ngada tarkaua be i, angke ngada alak na dao i na nibasu muyu i, amang na poso muyu do i.” ning si Tautan ngon kinjang taro mantata matukakkak matukikkik maniopi siubeon nia.

                Adopentong, jama tot jama ulu do ma da, iaua ia do pe i, pompar ni si Tautan do rupani.

                “Oton ayah, mauliate mada ipar di denggan ni roa muyu i di amang na poso muyu on!” ning si Tautan muse do pe mangolas-olasi ia laos muli taro mekel-ekel.

                “Olo, pajolo mamu!” ning ia mandemes pangalusna milasan odokan ia di ngali ni ari i, bo dua noli mamasu te ia antong manyongot on.

 

Tombang Bustak, 2005

Jasinaloan

Published in: on 6 April 2009 at 02:00  Comments (1)  
Ikuti

Kirimkan setiap pos baru ke Kotak Masuk Anda.