Si Oto na Bisuk

               

                 I maso na itom na robi, antargan di angoluan na majop madenggan suangkon gala-gala na markaombu, suangkon sarumpaet na lobot bunga. I napa-napa ni Sorik Marapi na martimbus maripul-ipul. I tano pantis tano barerang,tano na panapa-napa ibana parbanjaran ni si tuan na jaji si tuan na torop, tano na pabuntu-buntu ibana atubuan ni ri na manyaropang, sampilpil marliskang sumurat tano, tano na nigurbaki napu marlapu-lapu,  nipintas-pintasi rura panomburi.

                Saro najolo tuk ma sonangna angoluan ni angka dongan di luat i. Sinur na pinahan mompak na nisuan, martunas song mata ni onas, marranting, mardangka marparbue, Tuk jamaon tuk pangonjat ni siubeon. Saro nandiganni olat ni i pe tola ma i.  Arana’tong inda jabat lanjang angan-angan. Dia  na dapot i pe mohot, dia na so dong ulang ipatuadong. Inda le suangkon parkabang ni ubung hum na paincat-incat siadabuan. Angke anggo agiot do na nipaiut inda marna muhut na nipunjut.

                Tai sindok i, gorarna mantong jolma manisia. Nangkon be jolo nidok alak na sabanjar na saluat, salang na saamang-sainang pe marbeso do pangalahona. Arambir na samayang i pe marnagodang do Suang muse songon tokok ni gordang sambilan i. Muda di Pakantan udor gorarna, di Manambin jogo-jogo ningna, ditaan boto pakutili de i idokon dongan. Salangku asing panjangati marasing panigaina. Sundat ni na mangolu tele.Artina jamuda nangkini nidok na sonang angoluan i, idaon ni simanyolong do da i. Muda nitilik salung di bagasan roana na paasing-asing do pangirasoanna. Deba tata pe nida na dong do na solot di roania marsamohok-samohok.

                Jadi songon i ma da dongan si panise si pambasa, na martua na denggan roa. Dia dongan naingkan ita turionkon on si Katuik do gorar sapetona. Tai dongan anggo di banjar nangkinondi leng na si Bisuk Naoto do pio-pioan ni dongan maradopkon ia. Dia do le so songkon i? Arana na dodasma nida pasimbil-simbil pangalaho nia tingon dongan na balok. Tu jae ning kalak anggo ia tu julu do ning ia. Bo pe non saguman mandoksa anggo ia na marsuat di naningia do ia. Jamuda marpupu alak mangulayas marlanteh ni anganna tusia, indantong jabat na iampirkon iantures ia ba i. Lek na ro juo do ia tu jambur an.

                Muda non tibo di ulaon tong tong ma ia si pangoloi, dodasan mangankon toda-toda ni dongan. Muda topot di  siluluton dia na dumao tu si ma ia mandok parhalan sanga manjamitaon na urak bilangan. Dung songon i, inda juo merjut sanga ia mandawah. Tata de nida boi nia isuruon nayang simanjojakna manangion na maisuru.Muda naron adong na sohot-sohot na mambaen toktok ni utok-utok marsapa do alai disia. Dung idokon ia naron pandapot nia martata ma alai songon na mangalayasi, angke di alai na sihil do pangantusi nia. Ben na songon na tarpaoto-oto i, aropku i  ma da so ni dok alak ia si Bisuk na Oto.

                Sakali sanoli songoni ma da . Dompak aramianna natobang-tobang di lopo ni angkanta Jamanggete i. Sabotulna um na riburna do on, na bahatan na marutang. Jadi ke ke sada de naron painte-inte so malongon arana alangan manombo sanadeba mandok     “Tuliskon jolo angkang! Padomu ma dot donganna i!” na marutang. Muse Jamanjontir tong dompak rahang ni carito di jambur i. Margonti soluk dongan martorapan muap ni tarutung manyogi tangkuhuk niba, musim tarutung’ntong dompak.

                “ Adong do pe dongan tarutung sigaja muyu i, amu dabo um na carito sajo do, tama ni aha de i sugari ioban kamu jiba pinomat um marsaruang!” ning Jamangkilang.

                “Alaaa, sada -sada do ma boto amu. Si repes i nang tibu do abis, sidingkil na ilambung ni bondar i inda na aru upamatai, siatak batu i  pe na upajiar de songoni i di toru na i so adong panganon ni binatang,anggo situmbaga i aropku tardua nai isi, muda sijabak na donokkon batang ni potar i madung manampuk do sude, sijantung i anggo na so ituak ni pitudar sanga antalas anggo um lima nai adong do pe uida, si roti i umbahat do pe, tai sigaja i nangkinin ma pangabisan ulotap.” Ning Jamanjontir ngasngasan dongan mambegesa.

                “Amman! Nalongkop do dabo sude ragam mocom ni tarutung muyu te!”

                “Olo”

                “Abiskamu dontong nangkin sigaja i?” ning Jamangkilang marsapa.

                “ Aaa, i ma da nangkan dokononki, tai ma ipajolo amu manyapaisa, ulang songon na mangantak obar muyu i. I ida amu dontong na marampar do ma ulit ni tarutung sakuliang ni sonta i. Anggo sugari laku, aropku tonga dua padati adong do isi. Jadi na rumiam do ma lanok, lanok rata, siurkur di si. Um pas nangkin madabu bulus uoban tu toru ni sopo i. Jaaap ningia ulobong, lobong duantong i. Um kulobong na rogom ma lanok rongkon lanok rata mangaroroisa. Ututupkon mangulaki ubaen tu adangan andilongki, i bagas do ma ami pangan dot alak bagas!” ningna.

                “Ganjing do roa niba ba i, sapalana lanok rata i ma, anggo nga di nahodar na dursun sanga na rota na so tama do i inganannia.” Ning Janagkilang.

                “ Ke dongan, songon dia ma ning roamu so tarpinangan tarutung i, oni ulang iganggu lanok i iba.” Ning Jamanjontir mandok si Bisuk na Oto.Mikim-mikim kinan dongan painte ia mangalusi. Na giot manjalai partataan dontongon ning roa ni alai. I sirup si Bisuk na Oto jolo tes paet nia sandornguk baru mangalus.

                “Anggo au ba na momo de i.Ujuluk urutku dot tangan siambirang baru ubaen tu ginjang, tontu tutangan siambirangki de songgop lanok rata i, baru ma upangan tarutung i!” Ning ia mangalus sotik pe taru so alangan ia mandoksa, mangkardak dongan mambegesa, hukkek na minum marsitulbasan. Peto ma ho si Bisuk na Oto! Ning kalai.

                Anggo jiau ba dongan  akal-akal me na ibaen nia i,i ma so ugonti gorar nia i. Si Oto na Bisuk do ma gakku!

 

Bandar Khalifah, 26 Oktober 08

Jasinaloan

Published in: on 6 April 2009 at 01:53  Tinggalkan sebuah Komentar  

The URI to TrackBack this entry is: https://bakhsanparinduri85.wordpress.com/2009/04/06/si-oto-na-bisuk/trackback/

RSS feed for comments on this post.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: